Gravejournalist og forfattar Odd Isungset har fått tilgang til fortruleg kommunikasjon mellom Utanriksdepartementet og dei norske ambassadane da krisa råka, og fortel om maktspelet bak karikaturstriden. Han viser korleis religiøse og politiske makthavarar i Egypt, Syria, Iran og Qatar brukte karikaturstriden for å sikre eiga makt.

I sitt mulitimedia-fordrag viser han ei rekke klipp frå norske og internasjonale dokumentarar og reportasjar. Han kombinerer dette med opplesing frå boka, og med bilde og faksimiler som viser korleis ei gruppe danske imamar nytta falsk dokumentasjon i sin kampanje mot Danmark og Jyllands-Posten. Han viser også fortrulege dokument som dokumenterer at syriske styremakter visste om opprøret som førte til at den danske og norske ambassaden brann ned til grunnen.

Foredraget gir oss ei ny forståing av saka, og av kven som hadde ansvaret for at situasjonen kom ut av kontroll for 20 år sidan. Vi får også ny innsikt i kor hardt pressa utanriksminister Jonas Gahr Støre og Magazinet-redaktør Vebjørn Selbekk var under striden.