Lukk søk
Dieđut ohcciide
Sáhtát ohcat doarjaga Miellahttofoanddas honoreret gaskkustemiid maid Norsk Forfattersentrum miellahtut čađahit. Ii addojuvvo doarjja mátkke- ja orrungoluide, iige lanjaid láigoheapmái. Bohtet eanet ohcamat Miellahttofondii go maidda mii sáhttit juolludit doarjaga. Loga njuolggadusaid dárkilit ovdal čálát ohcama!
Miellahttofoanda doarju máŋga iešguđetlágan prošeavtta. Ođđa álggaheaddjit ávžžuhuvvojit ohcat. Maŋimuš jagi lea doarjjasubmi leamaš gaskal 3000 ru ja 25 000 ru, dan duohken makkár prošeakta lea man galle miellahttu das leat mielde.
Ohcanáigemearit
Jagis leat golbma ohcanáigemeari: guovvamánu 15. b, miessemánu 15. b. ja čakčamánu 15. b.
Njuolggadusat Miellahttofoandda ohcciide
1. Miellahttofoanda sáhttá dušše doarjut honoráramáksima Norsk Forfattersentrum miellahtuide.
2. Miellahttofoanda doarju dábálepmosit gaskkustandoaimmaid, ii giehtačállosa ovdáneami, research, girjealmmuhemiid, jietnabáddemiid iige márkanfievrredeami.
3. Go lea ovttasbargu gaskal čálli ja eará dáidda- ja kulturovdanbuktimiid de doarju miellahttofoanda dušše čálli.
4. Miellahttofoanda ii doarjjo doaibmabijuid mat leat čađahuvvon ovdal ohcanáigemeari.
5. Eaktun oažžut doarjaga lea ahte ohcamis lea bušeahtta- ja ruhtadanplána justa dan dihto doaibmabidjui masa ohccojuvvo doarjja.
6. Miellahttofoanda ii doarjjo čájálmasmátkkiid mat gusket Kultuvrralaš skuvlalávkii (DKS), muhto sáhttá ovdamearkka dihte doarjut ovdaprošeavttaid geahččalančájálmasaid dahje gaskkustankurssaid čálliide geat háliidit johttit DKS:in. (Nu mo álo, de galgá doarjja geavahuvvot čállái/čálliide dákkár doaimmaid oktavuođas).
7. Bohtet eanet ohcamat Miellahttofondii go maidda mii sáhttit juolludit doarjaga. Lea oalle hárvenaš ahte foanda sáhttá doarjut seamma ohcci maŋŋálagaid. Ii oktage ohcci sáhte vuordit oažžut fásta doarjaga.
8. Miellahttofoanda vuoruha lágidemiid mat leat buorrin máŋgga čállái.
9. Miellahttofoanda vuoruha doaibmabijuid maid unnit aktevrrat lágidit, geain ii livčče leat ruhta lágidit doaimma čálliiguin foandda doarjaga haga.
10. Miellahttofoanda áigu áŋgiruššat ahte juolludeamit gokčet viidát geografiija, čállinvugiid, gielaid ja girjjálašvuođa šáŋŋeriid dáfus.
11. Konkrehta bures jurddašuvvon ohcamat vuoruhuvvojit.
12. Sii geat ožžot doarjaga Miellahttofoanddas leat geatnegahtton sáddet raportta.
Miellahttofoandda stivra:
Amalie Kasin Lerstang (stivrrajođiheaddji)
Rune Hjemås
Stian Johansen
Tyra Teodora Tronstad (Norsk Forfattersentrums stivrraovddasteaddji)
Sumaya Jirde Ali (várrelahttu)
Norsk Forfattersentrum miellahttofoandda njuolggadusat
Mearriduvvon jahkečoahkkimis guovvamánu 15. b. 1974, rievdadusat mearriduvvon jahkečoahkkimis guovvamánu 27. b. 1981, jahkečoahkkimis njukčamánu 10. b. 1989, jahkečoahkkimis njukčamánus 15. b. 2002, jahkečoahkkimis cuoŋománu 8. b, jahkečoahkkimis cuoŋománus 5. b. 2014 ja jahkečoahkkimis bearjadaga cuoŋománu 5. b. 2019.
§ 1 Norsk Forfattersentrum miellahttofoanda
1.1. Miellahttodiva man Norsk Forfattersentrums miellahtut mákset ja 1,5 % gaskkustandivvagis čálliid bargguin galgá mannat Norsk Forfattersentrums Miellahttofondii.
1.2. Foandda vuođđokapitála lea 50 000,-. Foandda vuođđokapitála galgá leat disponibel Norsk Forfattersentrum jahkečoahkkimis/erenoamáš jahkečoahkkimis. Erenoamáš dilálašvuođain sáhttet foandastivra, ja čálliid-ovddasteaddjit Norsk Forfattersentrum stivrras, disponeret vuođđokapitála, 2/3 eanetloguin.
§ 2 Foandda ulbmil
2.1. Foandda ulbmil lea juolludit ruđalaš doarjaga doaibmabijuide mat leat Norsk Forfattersentrum miellahtuide buorrin.
2.2. Foanda sáhttá doarjut eavttuid vuođul maid Norsk Forfattersentrum jahkečoahkkin lea mearridan. Sáhttá dušše addot doarjja prošeavttaide main sáhttá leat mearkkašuhtti miellahtuid cealkinfriddjavuhtii ja/dahje sisabohtui.
2.3. Foandaruđat sáhttet geavahuvvot doarjjan fágalaš soahpameahttunvuođaide mat čuhcet čáppagirjjálaš čálliidorganisašuvnnaid miellahtuide. Áššemearrádusat doarjagii soahpatmeahttunvuođaid oktavuođas fertejit dahkkot ovttas čálliid miellahtuiguin Norsk Forfattersentrum stivrras.
2.4. Foanda ii sáhte doarjut dábálaš doaibmagoluid.
2.5. Dábálaččat ii doarjjo foanda seamma doaibmabiju máŋgii, das sáhttá spiehkastit jus leat prošeavttat mat bohtet ollu čálliide buorrin.
§ 3 Foandastivra
3.1 Foandastivrras leat 5 miellahttu: jođiheaddji, 3 dábálaš miellahttu ja 1 miellahttu válljejuvvon várrelahttun. Várrelahttu ii leat geatnegahtton boahtit čoahkkimiidda, muhto gohččojuvvo jus eará lahttu ii sáhte boahtit.
3.2. Foandastivra vállje ieš jođiheaddji, jahkái ain hávális.
3.3 Norsk Forfattersentrum jahkečoahkkin vállje foandastivrra guovtti jahkái ain hávális, ja lea vejolaš válljejuvvot ođđasit guktii.
3.4. Leat dušše Norsk Forfattersentrum miellahtut geat sáhttet válljejuvvot. Jođiheaddji dahje okta dain dábálaš miellahtuin galget maid leat miellahttun Norsk Forfattersentrum stivrras.
3.5. Luohpama oktavuođas sáhttet čálliid ovddasteaddjit Norsk Forfattersentrum stivrras nammadit dievasmahtti foandastivrramiellahtuid jahkečoahkkináigodagas.
3.6. Foandastivrras galgá leat čoahkkin go unnimusat okta stivrralahtuin gáibida dan.
§ 4 Foandastivrra mearrádus
4.1. Foandastivrras lea mearridanváldi go unnimusat 3 miellahttu leat sajis.
4.2 Juohke miellahtus lea okta jietna – dattege lea nu ahte várrelahttu sáhttá dušše dalle jienastit go ovttas dain nuppiin miellahtuin ii leat vejolašvuohta jienastit.
4.3. Go leat prinsihpalaš áššit de berre foandastivra bivdit rávvaga čálliid ovddasteddjiin Norsk Forfattersentrum stivrras.
4.4. Foandda jahkedieđáhus ja dárkkistuvvon rehketdoallu buktojuvvo ovdan Norsk Forfattersentrum jahkečoahkkimis. Jahkečoahkkin vállje rehketdoallodárkkisteaddji.
4.5. Foandastivrra mearrádusat čállojuvvojit protokollii.
§ 5 Foandda njuolggadusaid rievdan
5.1. Norsk Forfattersentrum jahkečoahkkin sáhttá rievdadit foandda njuolggadusaid dábálaš eanetloguin. Rievdadusevttohus ferte leat sáddejuvvon miellahtuide unnimusat 14 beaivvi ovdal jahkečoahkkima.
5.2. Jus rievdadusevttohus mearriduvvo jahkečoahkkimis, de sáhttet čálliid ovddasteaddjit Norsk Forfattersentrum stivrras dahje foandastivra mii lea válljejuvvon dan jahkečoahkkima rádjai, sáddet mearrádusa 14 beaivvis iežaset miellahtuide miellahttojienasteapmái.
§ 6 Foandda heaittiheapmi
6.1 Foanda sáhttá dušše heaittihuvvot erenoamáš mearrádusa bokte Norsk Forfattersentrum jahkečoahkkimis. Mearrádusas ferte leat disponerenplána foandaruđaide.
6.2. Jus evttohus heaittiheapmái mearriduvvo jahkečoahkkimis, de sáhttet čálliid ovddasteaddjit Norsk Forfattersentrum stivrras dahje foandastivra mii lea válljejuvvon dan jahkečoahkkima rádjai, sáddet mearrádusa 14 beaivvis iežaset miellahtuide miellahttojienasteapmái.
