Har du lyst til å arbeide med forfattarøkonomi og litteraturformidling? Vil du arbeide strategisk for å skapa leselyst og løfte fram midtnorsk samtidslitteratur? Vi søkjer etter ein målretta og dedikert person til å leie Midt-Norge-kontoret vårt.

Om stillinga

Du skal byggje ut og vedlikehalde eit nettverk av oppdragsgjevarar, finansieringskjelder og samarbeidspartnarar som Den kulturelle skulesekken, fylkeskommunane, kommunar, skuleverk, bibliotek, festivalar, litteraturhus, forfattarlag og institusjonar. Det er ein stor fordel med kunnskap om forfattarøkonomi og forståing for offentleg forvaltning og politiske prosessar.

Leiaransvar

Avdelingsleiaren har personalansvar og arbeider tett med dagleg leiar og resten av leiargruppa.

Du skal:
• arbeide politisk og strategisk for å styrke litteraturformidlinga og forfattarøkonomien.
• representere organisasjonen og samarbeide med aktørar i Møre og Romsdal og Trøndelag.
• følgje opp regionale planar og avtalar om driftstilskot.
• administrere kontordrifta og følgje rutinar for økonomistyring og rapportering.
• bidra til eit trygt og godt arbeidsmiljø i organisasjonen.

Formidling, arrangement og informasjon

Målet vårt er å skaffe oppdrag til medlemmene og å yte god service til oppdragsgjevarar i Møre og Romsdal, Trøndelag og resten av landet. Dei største prosjekta våre er Æ Å Trondheim litteraturfestival, Litterær hagefest i Adrianstua og Skriveforum.

Du skal:
• formidle heile spekteret av norske samtidsforfattarar til oppdragsgjevarar.
• planleggje og gjennomføre prosjekt, skrivekurs og arrangement for ulike aldersgrupper og målgrupper.
• gjennomføre medlemskurs og medlemsmøte.

Kven ser vi etter?

Vi søkjer etter ein person med eit sterkt engasjement og nysgjerrigheit for heile spekteret av litteratur, inkludert samisk litteratur, barne- og ungdomslitteratur og sakprosa.

Du treng relevant utdanning eller yrkeserfaring innan litteratur, journalistikk, kommunikasjon eller eit nærskyldt fagområde. Erfaring med økonomistyring, leiing og personalansvar er ein stor fordel, og du må like å samarbeide med andre. Kunnskap om opphavsrett og åndsverklova vil koma til nytte. Du må ha god skriftleg og munnleg formuleringsevne.

I denne stillinga får du:
‍• ei spennande leiarrolle i litteraturfeltet.
• samarbeide med forfattarar, oppdragsgjevarar, arrangørar, litterære miljø i Midt-Norge og skribentorganisasjonar.
• ein artig, utfordrande og meiningsfull jobb.
• eit godt arbeidsmiljø med dyktige kollegaer ved fem avdelingskontor.
• svært gode velferdsordningar.

‍
Norsk Forfattersentrum arbeider med berekraft, mangfald og inkludering. For å løyse arbeidsoppgåvene ynskjer vi oss tilsette med ulike bakgrunnar, erfaringar, kompetanse og perspektiv. Vi ynskjer å styrke organisasjonen sitt arbeid med samisk litteratur og litteratur på dei nasjonale minoritetsspråka. Å kjenne samisk kultur, litteratur og institusjonar kan vera ein fordel.

Arbeidsstad: Trondheim, Bakkegata 1A.

Meir informasjon får du frå dagleg leiar Ingvild Christine Herzog: 21 09 57 01 / 980 80 800.

Det må reknast med noko kveldsarbeid og reising. Lønn etter avtale. Oppstart etter avtale. Intervju vil bli gjennomførte i starten av september. Attestar og vitnemål skal leggjast fram på intervjuet.

Skriftleg søknad og CV skal sendast seinast torsdag 13. august 2026 via søknadsportalen på finn.no. Finn-annonsen og søknadsportalen er tilgjengeleg frå 3. juli.

Om oss

Norsk Forfattersentrum vart etablert i 1968 for å skapa kontakt mellom forfattarar og publikum og for å sikre forfattarane honorar for oppdraga. Organisasjonen gjev råd og yter service til forfattarar, oppdragsgjevarar og publikum i heile landet. Dei 2000 medlemmene våre skriv, gjendiktar og omset skjønnlitteratur og sakprosa for barn, ungdom og vaksne.

Norsk Forfattersentrum sitt Midt-Norge-kontor vart etablert i 1982 og har bidrege til å byggje opp og tene eit mangfaldig litteraturmiljø i Trøndelag og Møre og Romsdal. 170 medlemmer bur i Midt-Norge. Vi arbeider for å gjeva forfattarane oppdrag både internt i landsdelen og i resten av landet. Viktige samarbeidspartnarar er mellom anna Trøndersk forfattarlag, Møre og Romsdal forfattarlag, Litteraturhuset i Trondheim, Bjørnsonfestivalen og fribyordninga.

‍