Skriv du om natur, naturtap og klimakrisa, eller er engasjert i dette? Det kan kjennast meiningsfullt å engasjere seg, men det kan òg vera krevjande. Vi trur det kan vera nyttig å bli betre kjent med kvarandre og dele erfaringar.

Norsk Forfattersentrum inviterer difor til eit digitalt medlemsmøte for å kople oss saman og inspirere kvarandre.

Tid: 18. november, kl. 13:00–13:45

Stad: Digitalt (kontakt Siri Aurland Bredesen om du ynskjer å delta og ikkje har fått lenka tilsendt)

Teknisk assistanse før og undervegs i møtet: Siri Aurland Bredesen: tlf. 48 14 99 21 / 21 09 57 72 |  e-post: siri@forfattersentrum.no

Møtet er ope for alle medlemmar i Norsk Forfattersentrum – uavhengig av kva sjanger eller aldersgruppe du skriv for, og uansett om du skriv sakprosa eller skjønnlitteratur.

Program:

• Velkomen ved rådgjevar Guri Sørumgård Botheim.

• Innlegg frå forfattar Sigri Sandberg om erfaringar med å formidle litteratur om klima- og naturtap.

• Truslar og hets? Dagleg leiar Ingvild Herzog informerer om varslingsmottak.

• Moglegheiter for oppdrag innan temaet? Kort orientering frå kommunikasjonsmedarbeidar Atle Berge.

• Vegen vidare. Kva har medlemmane behov for?

Sigri Sandberg

Sigri Sandberg er forfattar og journalist. Ho voks opp i Eivindvik, ytterst i Sognefjorden – og i Bergen, ho bur nå både i Oslo og Luster. Har òg budd mange år på Svalbard. Ho har skrive tjue bøker – om friluftsliv og polare strok, om klima, natur og landskap, om nattehimmelen, om fjellet, fjorden og havet. I sakprosaboka «Det året eg vakna» undersøkjer ho kva som skjer med naturen og oss. Korleis kan vi ta innover oss alle endringane utan sjølve å gå til grunne? Korleis kan vi snu bekymring til eit positivt engasjement?

‍

Velkomen!